M.Azat Ependige 30 Soal

Salam hörmetlik M.Azat ependim,

Aldimizdiki bir ay ichide élan qilghan ajayip nadir yazmiliringizdin weten ichi we sirtidiki Uyghur jamaiti heqiqetenmu köp zoq aldi. Zoq aldi désem xata bolidu. tesirlendi, hayajanlandi, silkindi we oylandi. Bolupmu, ziyalilar qatlimidiki özini milletning gémini yigüchi atap yashawatqan serdar kishilirimiz chungqur ilham aldi.

Bügünki künde, bizge, bolupmu biz démetliklerge muhebbet hékayisi, Shéir - dastan, Naxsha – muzika dégenler tétimaydu. Uni oqup, anglap hözurlinidighan zaman téxi kelmidi. Biz üchün Xelqimizning mewjud dertliridin artuq hékaye yoq. yürikidi azapliq yighisidinmu tesirlik shéir – dastan, naxsha – muzika yoq. Shunga Ilmiy, janliq, udul yézilghan, qaratmiliqi, delil – ispati bolghan tepekkür jewherlirila nérwilirimizni ghidiqlap, rohimizni oyghitish meqsidige yételeydu. Qandaq yashash, nime qilishni ögiteleydu.

Bügün ishtin qaytip kéliwétip, poyizdiki élan taxtisigha chaplanghan „Agah: Pelisepe sizni we dunyani özgerteleydu!“ dégen ibarige közüm chüshti. Pelisepining hayattiki roli heqqide köp oylinip olturmidim. Xiyalimgha, bizningmu peylasoflirimiz bolghanliqi, bügün hör, bextlik yashawatqan nurghun millettin Yüsüp xas Hajip, Farabige oxshash peylasoflar törelmigenliki, shundaqtimu ular érishken yaxshi kündin bizning mehrum qéliwatqanliqimiz we bu bextsizlikni keltürüp chiqarghan amillar kiriwaldi ….

Turupla sizni oylap qaldim. „Millitimiz tégige yételmeywatqan nurghun mesililer bar. Ziyalilirimizning kallisigha soallar toshup ketti. Ular bu soallarning ya jawabini tapalmay aware, yaki tapqan jawabini bashqilar bilen ortaqlishidighan sorun tapalmay aware. Shundaq iken, nimishqa bu mesilini M.Azat ependidek yüriki mesh`el, pikirliri fontandek bir adem bilen hel qilmaymen?” dégen pikir tughuldi kallamda.

Bu seweptin, sizge 30 soal tashlap, buning jawabigha érishish niyétige keldim.

Pikrim qesiride tizilip yatqan neq 30 soal yoq. Sorisam tügimigidek soallarni elwette hazirliyalaymen. Lékin, muhim bolghan, jiddiy bolghan témilarda bir soal – jawap söhbiti élip bérishning ehmiyiti méni jelp qiliwatidu.

Bu arqiliq, xususen men yetmekchi bolghan ikki nishan bar:

1. Wetendiki ziyalilar nezeriyiwi bilimlerde chet`eldiki ziyalilardin köp üstün tursimu, emeliy bilim, uchur, purset jehette köp cheklimige ige. Bu soal – jawaplar méningche, ular üchün bir qimmetlik ders bolup qalidu.

2. Wetinim.org munbiri yéngi quruldi. Bu makanni weten`ge qarita tosiwetkidek pikir qilmisaqla, bashqa hichqandaq dexli .- terüz uninggha qara kölenggüsini tashliyalmaydu. Sizning merdane jawapliringiz munberge zinnet béghishlaydu. Nurghunlighan ziyalilirimizni jelip qilidu. Buning bilen torimiz awatlishidu we tereqqi qilidu. Bu yene bir menidin bizge qilghan yardimingiz bolidu.

Démekchi bolghanlirim mana mushu.

Bu pikir – tekliwimni ret qilmaydu, dégen ishench bilen, soallarni teyyarlashqa kirishmekchimen. Méning soal sorash usulum; noqul soalni tashlap qoyup, jawapni kütüsh olturush sheklide bolmaydu. Bu soalni peyda qilghan amillar toghrisida öz chüshemchemni qisqiche izahlap ötimen. Bundaq bolghanda sizning nérwiliringizni téximu ziyade ghidiqlighili, ichingizdiki köprek yulup chiqqili bolidu, dep oylaymen.

Tekliwimni qobul körsingiz, bu xetke jawap yazmisingizmu bolidu. Jawabingiz soallar qoyulghanda bashlansun. Mubada qobul körmisingiz, derhal jawap yolliwetsingizmu bolidu.

Hörmetlirim bilen:

Uyghur Tékin

Menbe: www.wetinim.org