PDA

View Full Version : Uyghur Sehraliri



Unregistered
01-07-08, 11:41
Uyghur Sehraliri

Menggütash

Gül purar, reyhan purar , shadiman sehralirim,
Hemnepes, yoldash manga, natiwan sehralirim,
Bu qelb rishtimni ching, baghlighan sehralirim,
Penjigah, newruz küyi, yangrighan sehralirim,
Qush bolup uchtum séningde , bipayan sehralirim.


Köz échip körgen idim, ushbu ziminni tunji ret,
Üginip unda diyanet,yashidim insan süret,
Baliliq chuqanlirim , sendin taralghan aqiwet,
Bal shunga ichken sularmu, karizliringda bir nöwet,
Anidur, perzent üchün , méhriban sehralirim.

Yer térip qaqas ziminni gül qilar déhqini bar,
Dastixan kengdur haman, töride méhmini bar,
Bagh qilar chölni ünümsiz, uprimas ketmini bar,
Yaxshigha yaghdek yarashqan süpsüzük asmini bar,
Méhniti alemge reng,dastixan sehralirim.

Yadlinar pesilliringde shadliqim, kechmishlirim,
Tupriqing néimet manga, sendidur kelmishlirim,
Baghridek seynada keng toy salur tengtushlirim,
Bagh özi, tekte pewes, dur kebi kishmishlirim,
Tügimes naxsha emesmu, yashnighan, sehralirim.

Üjmiler teqqas ene bowilar simasigha,
Yiliki tolghan baturning, dili nur- ziyasigha,
Közüngni sürtküng kélur, tashliri, giyahsigha,
Musapir bolghan chéghingda özge el dalasigha,
Ah, qara hijranda qalsam, asrighan sehralirim.

Alma hem enjürliri, temde yigane, yer guwah ,
Qoghuni méhnet süyide ey bolur, derdke dawa,
Ushbu xushbuy makanda qilidu bulbul nawa,
Men qachan kechtim uningdin, qaldim xazandek bi dawa,
Her qétim kochangda mangsam, qanmighan sehralirim.

Tozudi unda anamning bagh kebi- hösni, téni,
Tagh süpet mezmut atamning muzlidi, atesh qéni,
We lékin izlar bésip kelmekte ewlad herküni,
Tügimes arman bilen kökligey erning jéni.
Yashidi boranda tik, qehriman sehralirim.

Bir güzel dédi manga: sehrada qilma janni xar,
Topidur yégen éshing, sehrada sen biétibar,
Men dédim: qandaq kéchey? Puraydu sehra gül, ipar,
Yurtidin kechken kishining bolmiqi heq shermisar,
Qerz manga sehrani söymek, janijan sehralirim.

Unda bar tatliq tebessum, qamusqa tengdash sözliri,
Tikiler méhri bilen kengri jahan'gha közliri,
Baghrida chaqnaydu her dem chin wapa yultuzliri,
Özi tüzge köngli tüz, nurlinar aq yüzliri,
Seltenet, hürmetke teng pasiban sehrlirim.


Chünchide söhbet qurar , aqqan kümüsh terler bilen,
Naxshisi yangrar déhqanning, u xushal yerler bilen,
Qizliri gheyret, chidamda teng kélur erler bilen,
Tozumas illiq uwam , bézigen zerler bilen,
Herqachan qoynungdimen, newqiran sehralirim.

Tonuri oxshar quyashqa, nanliri quwwet , dora,
Nan bilen bolghan öre ni qesir,mezmut tura,
Shöhriti jewlan qilar darwazliringning tagh ara,
Sen eger hékmet déseng, hékmetni sehradin sora,
Saqimas cholpan'gha oxshash, chaqnighan sehralirim.

Bibaha keshpu- karamet, baghringda xoten qeghizi,
Herzaman quwwet manga, sendiki roh yiltizi,
Méhri ot aywanliringda, güldek hünerning méghizi,
Sende tarim, sende baghrash, chéhringdiki qutning izi,
Süpsüzük cheshme emesmu, qaynighan sehralirim.

Nede bar Uyghur, démek, shunda yéza sehrasi bar,
Men kebi tahir yigitning yézidin zohrasi bar,
Nurlinar etlesliri, doppidek yektasi bar,
Shunga her dil qétida bir körüsh sewdasi bar,
Qoyni yaz aptipidek , xanidan sehralirim.