PDA

View Full Version : Merhum Küresh Kösen Esleymen



Abdureshid haji
24-10-07, 12:34
Merhum Küresh Kösen Esleymen

(Küresh Kösen wapatining bir yilliqi munasiwiti bilen)

Abdureshid Haji Kérimi

Men merhum Küresh Kösenni 80-yillarning axiri téléwizorda körgen idim. U zamanlarda téléwizor ishlitish xelqimizde téxi omumiyyüzlük omumlishp bolalmighan we renglik téléwizor bazarda kem uchraytti.
Merhum küresh kösen “memliket boyiche ötküzülgen yash naxshichilarning téléwizorda maharet körsitish musabiqisi” da birinchi derijilik mukapatqa ériship renglik téléwizur bilen teqdirlen’gende, hemmimiz uni tebrikleshken iduq. Shundin tartip uning naxsha sadasi tengri téghining shimali we jenubighiche tarqilip, weten xelqi ichide nami chiqqan idi. Men 89-yili ürümchige xizmet bilen barghinimda u ittipaq tiyatirida bir meydan oyun qoyiwatqan iken. Shu küni u “yerni satmanglar” we “pul ” dégen naxshilarni yighlap turup éytqanda, men bir adettiki naxshichini emes, belki wujudi ottek yénip turidighan, weten-millitige cheksiz sadaqetmen bir inqilabchini körgendek bolüp, közlirimdin taramlap yashlar quyulghan idi.
Herqitim ürümchige kélish pursiti bolghanda, aldi bilen döng köwrükke bérip, küresh kösen orunlishidiki ün alghu lintisidin qanchisi ishlen’gen bolsa shunchini sétiwilip qeshqerge élip kétip köpeytip dostlirimgha sowghatliqqa birettim.
1998-yili 6 – ay mezgilliri idi. Men tashkenttiki tutqundin qéchip bishkekke mangmaqchi bolup, shopur bilen aldin kélishwalghinimiz boyiche, tashkent bilen qazaqistanning chigrisi bolghan chérnéyopka dégen yerde aptobus saqlap turattim. Qarangghu kéchide bir erkishi bilen bir’ayal kishi üzümzarliqning ichidin aptobus terepke qarap keldi. Ular yéqinlap kelgende, u kishining küresh kösen ikenlikini tonuwaldim. U anisi bilen bille shopurgha xuddi manga oxshash kélishiwalghan wedisi boyiche aldin pul bérip, aptobus saqlap turghan iken. Biz ikki qachaq tashkenttin bishkekke barghuche yol boyi uxlimay derd töküshüp mangduq. U hesretlik köz yashlirini töküp turup, özining ailisi tartqan külpetlerni we bir qisim uyghur mel’unlirining u chet’elge chiqqandin kéyinmu özige qilghan ziyankeshliklerni éytip ah urghan idi. Men merhumgha teselli bergenidim. Özümning uninggha bolghan ishenjini bildürüp, uning qimmitini özige bildürüshke tirishqanidim. Hemde uninggha bundin kéyin némilerni qilishning zörürlüki heqqide bir qatar meslihetlerni bergenidim.
Wetensizlik her’ikkimizni bille yashash imkaniyitidin mehrum qilghan idi. Epsus uning bilen ottura asiyada ikkinchi qétim qayta körüshüsh nésip bolmidi.
2003-yili 12-ayning 17- küni men türkiyide BDT din siyasiy panahliq élip, BDT ning bir tutash orunlashturushi boyiche shwétsiyige kélip orunlashtim. Men kélip bir nechche kün öte- ötmey mining kelgenlikimdin xewer tapqan küresh kösen türkiyidiki dostlirimdin mining téléfun numurumni élip, méni izdep tapqan idi. Men shu kündin itiwaren küresh kösen bilen shwétsiyidiki yéngi hayatni bashlidim. Gerche men turghan sheher küresh kösen bar sheherge ming kilométir uzaqliqta bolsimu, téléfonlirimiz we élxetlirimiz bir- birimizni herküni dégüdek uchrashturup turatti. U herqétim téléfon qilghanda, bir éghizmu shexsiy parang qilmaytti, her waqit weten-milletning ghémi we kelgüside qilidighan pilanliri heqqide éytatti. U oltursa , qopsa millet bilen wetenning teqdiri heqqidila sözleytti. U millitini , milletning menpeetini hemmidin ulugh biletti. Men 2005- yili 10-ayda küresh kösen turushluq sheherge uning yardimi bilen köchüp keldim. Biz shu kündin bashlap tiximu yéqinliship kettuq. Men yalghuz bolghanliqim üchün herküni dégüdek ularning öyige kilip bir wax tamaqta bille bolattim. Mubada men kilelmey qalsam, ularning yégen tamiqimu tamaq bolmaytti. Ular méni ailisining méhmini emes, belki dadisi ornida köretti.
Merhum shwétsiye uyghur komitétining kelgüsi pilanigha uyghurlardin nobél tinchliq mukapatigha bir kishini kirgüzüsh heqqide teklip bergen idi. Shwétsiye uyghur komitétining wekilliri buni bir éghizdin maqullap, uninggha jiddiy tutush qilduq. Deslepte dunya uyghur qurultiyining reisi erkin aliptékin’ge köp qitim téléfon qilip, uni nobél tinchliq mukapatigha körsitidighanliqimizni éyttuq. Erkin alptékin buninggha qoshulmidi we türmide yétiwatqan rabiye qadir xanimning buninggha eng yaxshi we birdinbir namzat bolalaydighanliqini éytti. Shu kündin bashlap biz merhum küresh kösen bilen bille alaqidar shexsler we her qaysi siyasiy partiyilerning mes’ulliri, hetta parlaménttiki parlamént ezaliri bilenmu köp qitim uchriship, ularning maqulluqigha érishtuq. Rabiye qadir xanimni nobél tinchliq mukapatigha körsitish boyiche tekrar- tekrar yizilghan 35parche yazma matériyal munasiwetlik hökümet erbaplirining hemmisige dégüdek bérildi. Mushu tirishchanliqlirimiz ünüm bérip bu ish axiri royapqa chiqqanda küresh ependi hemmimizdin bekrek xushal bolup hayajinini basalmighan idi…
2004-yili norwégiye rafto jem’iyiti rabiye qadir xanimgha rafto mukapati birish heqqide qarar chiqarghanda, shwétsiye parlamént ezasi Annelie Enochson xanim birinchi bolup merhumgha téléfon qilip bu xosh xewerni yetgüzgende, merhum qaqaqlap külüp: ” biz ghelibe qilduq! Biz ghelibe qilduq! Uyghur ghelibe qildi !” dep towlap, xushalliqidin yighlap ketken idi. Merhumning shu chaghdiki xushalliq héssiyatini teswirleshke qelimim heqiqeten ajizliq qilidu.
Etisi merhum manga téléfon qilip, rabiye qadir xanimgha béghishlap bir naxsha ijad qilghanliqini éytti we uni téléfonda manga anglatti. Men rastinla heyran qaldim, chünki bu naxsha shunche qisqa waqit ichide ijad qilin’ghanidi. Merhum özimu buninggha heyran qélip qandaqtur bir ilahi kuch manga medet berdi bolghay dégen idi.
2004-yili 11-ayning 7-küni norwégiyining bérgin döletlik tiyatirxanisida rabiye xanimgha 2004-yilliq xelq’ara rafto kishilik hoquq mukapati bérish murasimi daghdughiliq ötküzüldi. Yighin sehnisige chiqip duttar bilen “rabiye ” naxshisini orunlap, rabiye qadir xanimni tunji bolup uyghurlarning anisi dep dunyagha jakarlighan insan del merhum küresh kösen idi. Shundin kéyin rabiye qadir xanim dunya sehniside uyghularning meniwi anisi bolup birdek étirap qilinip tilgha ilindi we metbuatlarda ashkara élan qilindi.
2004-yili 10-ayning 12-küni rabiye qadir xanimning shwétsiyige kélidighanliq xewiri chaqmaq tézlikide pütün shwétsiye uyghurlirigha uqturuldi. Shu küni shwétsiyidiki 100 lerche uyghurlar bu möhtirem anini kütüwélish üchün her qaysisi özige yarisha teyyarliq qilip, deste- deste rengga – reng güllerni kötürüp birining keynidin biri stokholm arlanda ayroportigha mashina- mashina bilen aqti. Rabiye qadir xanim ayrupilandin chüshkende ular birining keynidin biri rabiye qadir xanimni quchaqlap, uni xushalliq yighisi bilen hayajanlirini basalmay shuarlarni towlap qarshi aldi. Ular yene rabiye qadir xanimgha alayiten ” rabiye” dep siyadan bilen yizilghan xet chüshürülgen uyghurche tonur nénini sowghat süpitide teyyarlighanidi. Bu nanni rabiye qadir bilen isimdash uyghur qizi rabiye uninggha qosh qollap tebessum bilen tengligende, rabiye qadir nanni qoligha élip uninggha yézilghan xetni körüp hayajanlan’ghanliqidin köz yéshi qildi. Men rabiye qadir xanimning közidin yash aqqanliqini tunji qétim körüp, uning heqiqeten bir aq köngül ,semimiy, uyghur xelqige wekillik qilalaydighan ana ikenlikini tonup yetken idim.
Rabiye qadir xanim shwétsiye parlaméntida, tashqiy ishlar ministirlikide “uyghurlarning dalay lamasi ” süpitide ayrim- ayrim kütüwélindi. Shwétsiye uyghurlirining wekili süpitide merhum küresh ependi bilen men rabiye qadir xanim hem sidiqhaji rozigha hemrah bolup parlamént sariydiki herqaysi minstirlikte bille bolduq. Shu qétimqi uchrishishta rabiye qadir xanim herqaysi axbarat orunlirining 50 din artuq muxbirining suallirigha qayil qilarliq jawab bérip, shwétsiye xelqini we shwétsiye hökümet dairilirini hang-tang qaldurup, uyghularni yenimu bir qedem ilgiriligen halda dunyagha tonutti. Shu kündiki yighin’gha shwétsiyidiki uyghulardin 300din artuq adem qatniship, rabiye qadir xanimni qarshi aldi. Bu ishlarning hemmisini merhum küresh kösen ependi bir qolluq orunlashturghan idi.
2006-yili küresh kösenning hayatidiki eng xushallinarliq bir yil bop qaldi: u perzentlik boldi. Shwétsiye medeniyet ministirliki merhumgha eskilstuna sheherlik medeniyet idarisidin bir yürüsh öy teyyarlap, uning uyghur xelq naxshilirini retlep , kitab qilip ishlesh hem ularni CD pilastinkisigha chüshürüshtin ibaret pilan ghayilirining emelge éshishigha qulay sharait yaritip berdi. U shu kündin étibaren hemmini untup , kéchini kündüzge ulap ishlep, bir tereptin uyghur xelq naxshilirini türi boyiche retlep tékistini uyghurche yazsa, yene bir tereptin notigha ilishqa kiriship ketti. U uyghur xelq naxshilirini 7rayon’gha bölüp, rayun xasliqi we alahidilikige asasen éytish meshqi bilen meshghul boldi. Bu kitabning in’glizche terjimisi we 7 rayunning xelq naxsha ـ muzika tarixini yézip chiqishqa qeyser abdursul mes’ul boldi. U wetendin 40 nechche CD naxsha pilastinkisini sétiwilip ekeldürüp, ularni türi boyiche bezilirini duttar bilen, bezilirini tembur bilen, bezilirini sattar bilen, bezilirini berbat bilen özi orunlap ularni kelgüside CD pilastinkiliri hem 7 parche kitap qilip ishlep chiqidighanliqini éytip xushalliqini bildürgen idi.
Biz uning yingi ishqa chüshkenlikini tebriklep uning ish binasigha barghinimizda u bizge oyun qoyush sehnisini körsitip , kélerki qétimliq dunya uyghur qurulitiyini ashu yerde chaqirish oyining barliqini éytqanidi. U: ” bu yerde 150 adem bimalal olturalaydu, reis sehniside kem dégende 30 adem olturalaydu, orunduqliri azade hem körkem. Bu terepte ashxanisi, taziliq öyi, tamaka chékidighan ayrim öyliri, kofiyxanisi, dem ilish zalliri, hawalinidighan baghchiliridin tartip hemmiisi bar…shunga qurultayning échilishigha biz sahibxan bolsaq” dep külüp ketken idi.
Uning éytip tügetküsiz arzu-armanliri bar idi. “weten dawasini qandaq qilghanda ünümlük élip barghili bolidu?” dégen bu mesile uning kallisidin her waqit ketmeytti. Bir küni u éntérnét tor betlirini aqturuop yürüp, xelq’ara qelemkeshliri birliki (International PEN Centre) torbétige kirip qaptu. Mezkur birlik mundin 100 yil burun qurulghan bolup, erkin sözleshni, erkin oqushni, erkin yézishni we erkin neshr qildurushni teshebbus qilidighan, shundaqla yüzdin artuq dölette shöbisi bar, birleshken döletler teshkilati astidikiA derijilik musteqil hem hökümetsiz birlik idi. Merhum küresh kösen uyghurlarningmu mushundaq bir xelq’araliq birlikke eza bolushining ularning musteqilliq dewasining yene bir xelq’araliq sorun’gha ige bolushidin ibaret intayin muhim rolini tézla tonup yétidu. U özining bu heqtiki qarashlirini bizge éytidu. Mundin burun qeysermu shundaq bir birlikning barliqini in’gilizche tor bétidin körgen iken.
Bu ishni royapqa chiqirish üchün hemmimiz qilidighan ishlirimizni teqsimliwalduq. Ish texsimatimiz boyiche, men mexsus xitayche torbétini seyle qildim. Derweqe, u birlikning tor béti b d t qollinidighan 3 xizmet tilining hemmiside chiqirilghan iken. Shundaq qilip merhum küresh ependi 3 ay waqit ajritip, shu birlikning xadimliri bilen birnechche qitim uchriship we pikir almashturup axiri xelq’ara uyghur qelemkeshler birliki qurush heqqidiki teshebbusname, chaqiriq, pilan, prinsip, nizamname we alaqidar höjjetlerning teyyarliq nusxisini teyyarlidi we ularni besh aydin kéyin munasiwetlik uyghur qelemkeshlirige tarqitishqa bashlidi. U hetta amérika, kanadalarghiche bérip, uyghur qelemkeshliri bilen biwasite uchriship bu matériyallarni ularning qollirigha yetküzdi. Merhum wapat étishning aldida, yeni 10-ayning18 – küni shwétsiye we norwégiye qelemkeshlirining mediti we mesliheti boyiche uyghur qelemkeshlirining teshkiliy apparatini békitip chiqip, shwétsye hökümitige tizimgha aldurup muqimlashturghan iduq. Bu jem’iyitimiz deslepki qedemde shimaliy yawropadiki 4 döletning qollishi we meniwi yardimini qolgha keltürgen idi. Ular bizni qollap: “yazghan eser we kitabliringlar bolsa bizge béringlar, biz neshir qilip béreyli” dégende hemmimiz hayajanlan’ghan iduq. Hemde arqa – arqidin 3 dölet bizni özlirining pat arida chaqirilidighan ilmi muhakime yighinlirigha tekilp qilip, bizning pütün chiqimimizni kötüridighanliqi heqqide wede bergen idi. U 73-nöwetlik xelq’ara qelemkeshler qurultiyining sénigalda chaqirilidighan yilliq yighinida xelq’ara uyghur qelemleshler jem’iyitining resmiy ezaliqining ushbu birlikke tewe bashqa qelemkeshler jem’iyetlirining bélet tashlap awaz bérishi bilen testiqlinidighanliqini köz aldigha keltürgende, ich – ichidin xushallinip: “uyghur b d t gha kiridighan boldi” dégenidi…
Merhumning axirqi ömri heqiqeten bek aldirashliq bilen ötti. U bir tereptin dunya uyghur qurultiyining ishigha bash qatursa, bir tereptin shwétsiye uyghur komitétining ishigha aldiraytti, bir tereptin “gherb shamili” jurniligha tutush qilsa, yene bir tereptin “uyghuriye” tor bétining ghémi bilen, yene birtereptin hör uyghur radiosining ghémi bilen aldirashla ötti. U 2006-yilliq pilanida, shwétsiye uyghur kommétiti ijraiye komitétining maqullishi bilen xujintaw bilen wang léchüenning jinayi qilmishlirini yézip chiqip, xelq’ara sotqa sunup ölüm jazasi ijra qildurush oyining barliqini éytip hemmimizni qayil qilghan idi.
Ashu künlerde xitay saqchi dairliri xuddi uning niyitini aldin biliwalghandek merhumgha herküni dégüdek téléfon qilip bisim ishletkenidi. Ular bezide merhumgha: “niyitingdin yan!” dése, yene bezide: “radioni toxtat!” deytti, yene birküni: “jurnalni toxtat !”deytti, yene bir küni: “qiliwatqan ishingni toxtat! Néme déseng biz shuni béreyli” deytti. Ular héli yumshaq , héli qattiq wastilar bilen uni rohi jehettin bekmu qiynighan idi. U eng axirqi qitim:” siler men dégen sharaitni manga hazirlap birelmeysiler, men silerge ishenmeymen. Bu hem silerning qolunglardin kelmeydu, eng yaxshisi xu jintaw yaki wang léchüen men bilen sözleshsun. Shu waqtida mesile ya undaq ya mundaq hel bolidu” dégende, ular merhumdin shal paxilini ündürelmey, taktikisini özgertip , qattiq waste ishlitishke ötkenidi. Ular merhumning wetendiki uruq tuqqan singillirini zerbe bérish nishanigha alghan idi. Hetta “qizil bashliq” höjjet tarqitip, küresh kösenni yurtida pipen qilishqa bashlighan idi. Singilliri téléfonda merhumning anisigha yighlap turup xitaylarning qilghan bésimlirini, özlirining tala – tüzde bash kötürüp mangalmaywatqanliqini, hetta bezi eqildin azghan kishilerning özlirini tillighanliqini éytidu. Buningdin köngli yérim bolghan merhumning anisi we singlisi merhumgha: ” küresh, radioda mundin kéyin sözlimeng, weten millet dep mawu qiliwatqan ishliringizni emdi yughushturuwéting…. Kim qilsa qilsun siz qiliwatqan ishlarni… Emdi mushu yerde toxtiting ” dégende,. Merhum derhal yewatqan tamiqini shire üstige zerde bilen qoyup: ” méning yolumni tosmanglar! Kim méning yolumni tosidikin , meyli u kim bolushidin qet’iynezer uruq tughqanliq munasiwitimni üzüp tashlaymen” dégenidi. Bu gepni anglighan anisi we singlisi yighlighan péti öydin chéqip ketken idi. Men merhumgha teselle birip tamaqni yiyishke zorlisammu tamaq gélidin ötmigen idi…
Merhum 2006-yili 10- ayning 29- küni yekshenbe küni kech saet 8din 35 minut ötkende tuyuqsizla jan üzüp ketti. Men merhumning undaq téz jan üzüshige ishenmey doxtur chaqirghan bolsammu, dawalash ünüm bermidi…
Men shu küni merhumni yoqlighach we uning anisi bilen mungdishish meqsitide chüshtin kéyin saet 5 lerde öyige barghan idim. Anisi bilen uzaq mungdashtim. Anisiningmu köngül pighanliri échilip xéli yaxshi bolup qalghan idi. Eslide anisining yürek késili qozghilip aldinqi künlerde bir az biaram bolghan idi. Doxtorlar opératsiye qilish üchün teyyarliq qiliwatatti. Emma merhum küresh kösende héchqandaq bir késellik alametliri yoq idi. Saet 7 bolghanda, ayali: ” hajimka, sili küresh ependige bir téléfon qilsila, kélip tamiqini yéwalsun, saetmu bir yerge birip qaldi” dédi. Men merhumgha téléfon qildim. U: ” men hazir jiddiy ishlewatimen. Rabiye qadir animiz ete kelmekchi, shungghichilik yazidighan doklatni yézip ülgürtüp qoligha bermisem, yalghanchi bolup qalimen. Sili apamlar bilen tamaqni yewersile, men bir azdin kéyin barimen…” dédi. Merhum yekshenbe künidimu iligen idi. Biz kechlik tamaqni yéduq, saetmu 8 din ashti, hemmimiz merhumning qaytip kélip tamiqini yéwilishini kütüwatattuq. Saet 8din 33 minut ötkende merhum keldi, ayali kéyimilirini saldurup somkisini qolidin élip, tamaq üstilige olturghuzdi. Men merhumning anisi bilen u tamiqini yep bolghandin kéyin salamlishay dep qarap olturdim. U orunduqta olturdi, bir piyale chayni qoligha ilip bir otlidi, bir burda nanni aghzigha saldi. Del shu peytte , u shu piti orunduqqa ghadiyip titrep közliri alaqariq bolghandek tartiship silkinishke bashlidi. Ayali méni chaqirdi. Derhal uning yénigha keldim. Kiriship qalghan qollirini tüzeshtürüp tomurini tutsam, tomur herkettin toxtighan, qolliri muzlashqa bashlighanidi. Anisi: “way balam, sizge nime boldi?” dep merhumni baghrigha bésip yighlashqa bashlidi. Men derhal qeyserge téléfon qildim. Angghiche abdushükürmu yügrep keldi. Bizning öyimiz yiraq emes, bir mehellide olturattuq. 5 minut ichide biz 3 erkishi merhumning anisi we ayali bolup 5 chong kishi hemde 3 ushshaq balilar yigha zare qilishqa bashliduq. 5 minut ichide jiddiy qutquzush mashinisi yétip keldi. Doxturlar jiddiy tutush qildi, qutquzush yérim saet dawam qildi, amal bolmidi…..
2 saetge qalmay dunyaning herqaysi jayliridin üzülmey téléfonlar kelgili turdi. Shwétsiyining bashqa sheherliride yashawatqan 100 lerche uyghur qirindashlirimiz arqa – arqidin merhumning jesidi bilen widalishishqa keldi.
Men merhumning ölümige bekmu qayghurghan idim. Kimlerningdur boynigha isilip allahgha nale qilip: ” i rebbim ! Küresh kösen’ge bergen ölümni manga bergen bolsangchu. U yash idi, men yashaydighinimni yashap bolup yéshim bir yerlerge birip qalghan adem idim. Méni élip ket, köresh qalsun” dep yighlighinim hélimu xire-shire ésimde. Merhumning tuyuqsiz ölümi manga qattiq tesir qilghachqa, bir mezgil es- hushumni yoqattim. Eshu waqitta bolghan ishlarni hazirghiche toluq ésimge alalmaymen.
Merhum 2001-yili shiwétsiyede chong tiptiki yurek opératsiyesini qildurghan idi.
Merhum 47 yéshida alemdin ötti. U bizge özining yangraq awazi bilen éytqan naxsha muzikilirini, yazghan kitab we shéirlirini, weten milletke bolghan cheksiz sap muhebbitini, biz menggü öginishke erziydighan jenggiwar, pidakar rohini qaldurup ketti.
Merhumgha janabi allahtin jennet merhimiti téleymen, amin!
2007-yil 25 – öktebir
shwétsiye- eskilstuna

Unregistered
24-10-07, 16:11
Rahmat Hajika,qolingizghga dart barmisun!!!!!!!!!!!!!!!!!!!!!!!!!
Rahmatlik Korash Kusan haqeqatan untulghusiz,pahirlindighan bir zat ikan!!!!!

Rahmat

Unregistered
26-10-07, 13:35
Hoemetli Abdureshid haji aka:
yazmiliringizdin Uyghur helking batur oghlani merhum Kuresh Kosenning hayating nekeder menilik otkenlikini korsitp beripsiz .Koresh Kosenni ozem we bashka nurghun kishilerge selish turup tolimu hijil boldum.

Unregistered
27-10-07, 15:51
merhum koresh kosenning wapatigha 29-oktebir bir yil toshudu.


shuning uchun aldirap tordin chiqerwetmisingizler!

Unregistered
14-07-09, 17:16
bas dogu turkistan deyil soyqirim gorinler devletsiz yashiyang putun turkler boyli oldiriyller
men surya turkmenlerindanam bezlerida coq oldirdiler
iraqtake turkmenlerde gene oylalar
ancaq biz turkler tak bayrang altanda yasharaq bizim qarshisimizda putun dunya bir olsada putun dunyayi topraga diz vurdururuk biz

tangri turku qorusun

charchilp
31-03-10, 12:23
Uning éytip tügetküsiz arzu-armanliri bar idi. “weten dawasini qandaq qilghanda ünümlük élip barghili bolidu?” dégen bu mesile uning kallisidin her waqit ketmeytti. Bir küni u éntérnét tor betlirini aqturuop yürüp, xelq’ara qelemkeshliri birliki (International PEN Centre) torbétige kirip qaptu. Mezkur birlik mundin 100 yil burun qurulghan bolup, erkin sözleshni, erkin oqushni, erkin yézishni we erkin neshr qildurushni teshebbus qilidighan, shundaqla yüzdin artuq dölette shöbisi bar, birleshken döletler teshkilati astidikiA derijilik musteqil hem hökümetsiz birlik idi. Merhum küresh kösen uyghurlarningmu mushundaq bir xelq’araliq birlikke eza bolushining ularning musteqilliq dewasining yene bir xelq’araliq sorun’gha ige bolushidin ibaret intayin muhim rolini tézla tonup yétidu. U özining bu heqtiki qarashlirini bizge éytidu. Mundin burun qeysermu shundaq bir birlikning barliqini in’gilizche tor bétidin körgen iken.

Unregistered
20-01-16, 07:27
Uning éytip tügetküsiz arzu-armanliri bar idi. “weten dawasini qandaq qilghanda ünümlük élip barghili bolidu?” dégen bu mesile uning kallisidin her waqit ketmeytti. Bir küni u éntérnét tor betlirini aqturuop yürüp, xelq’ara qelemkeshliri birliki (International PEN Centre) torbétige kirip qaptu. Mezkur birlik mundin 100 yil burun qurulghan bolup, erkin sözleshni, erkin oqushni, erkin yézishni we erkin neshr qildurushni teshebbus qilidighan, shundaqla yüzdin artuq dölette shöbisi bar, birleshken döletler teshkilati astidikiA derijilik musteqil hem hökümetsiz birlik idi. Merhum küresh kösen uyghurlarningmu mushundaq bir xelq’araliq birlikke eza bolushining ularning musteqilliq dewasining yene bir xelq’araliq sorun’gha ige bolushidin ibaret intayin muhim rolini tézla tonup yétidu. U özining bu heqtiki qarashlirini bizge éytidu. Mundin burun qeysermu shundaq bir birlikning barliqini in’gilizche tor bétidin körgen iken.
บาคาร่า holiday (http://holidaypalace-th.blogspot.com/2016/01/holiday.html)