PDA

View Full Version : Uyushush- Menggülük Chaqiriq



Elbilgin
21-07-18, 00:19
Uyushush- Menggülük Chaqiriq



Mesh’el Uyghur Guruppisi
2018-yili 7-ayning 21-küni


Bir ishni oyliyalighan we uni qilalighan adem meqsetke yételeydighan erkin adem bolidu. Bir ishni oyliyalighan lékin uning üchün heriket qilmighan adem meqsidige yételmeydighan ümütsiz adem bolidu. Bizde hemme adem ittipaqliq we ömlükning muhimliqini bilidu emma bezi ademler déginige emel qilmaydu yaki öz qilmishini bilmeydu. Bizdek ittipaqliqqa we ömlükke shu qeder muhtaj bir xelqning bu qeder köp ixtilap qilishimiz eqilge sighmaydu. Bizing béshimizgha kelgen paji’e we bala-qaza shu qeder chong ikenki, uni heqiqi bilginimizde hemmini tashlap Xitaygha qarshi birlishettuq. Wetende türmige azap chékiwatqanlarning azaplirini tessewur qilimiz, emma bilmeymiz. Lagirlardiki xorluqlarni angliduq, körmiduq. Shunga herzaman néme qilishni bilelmigende düshmen bir yerde qélip bir birimizni talawatimiz. 5-Iyul qirghinchiliqidin ikki yil ötkende Xitay démokratliri teripidin otturigha chiqirilghan, Xitaylarning Uyghurlarni öy bésip tutiwatqan bir sin’alghu xatirisini körüp hemmimizning démi ichimizge chüshüp ketken idi.Biz u ishlarni oylighan, anglighan, tessewur qilghan emma körmigen. Körgen ene shundaq yaman bolidiken, körüp qayta oyghan’ghandek bolghan iduq. Shuninggha oxshash wetende hazir boliwatqan zulumlarni biz bek cheklik da’iridila bilimiz, heqiqi ehwalning qanchilik échinishliq we éghir ikenlikini bilmeymiz. Xitay wetinimizdiki turmilerde we yépiq lagirlarda boliwatqan jinayetlirining pash bolup qélishini 100% kotrol qilip boldi. Biz wetendiki zulumni hés qilalaymiz lékin körelmeymiz. Bir birimiz bilen erzimes ishlar heqqide ixtilap qilishiwatqan waqitta, bir bashchi yene bir yétekchini haqaretlewatqan chaghda, bir goroh yene bir teshkilatni eyiplewatqan peytte wetende nechche yüzligen qérindashlirmizning yürek we börekliri sughuruwélin’ghan bolidu, nechche ming qérindishimiz yéngidin tutulghan bolidu, nurghun qiz -ayallirimiz depsende qilin’ghan bolidu.


Wetendikilerning bizdin némilerni kütidu? Wetendikilerning erkin dunyadiki qérindashliridin eng kütidighan ishi barliq ixtilap we talash-tartishni qayrip qoyup Xitaygha qarshi birlishish we wetendikilerni zulumdin qutuldurush ortaq nishani üchün küresh qilishtur. Bizning millitimiz bir, tilimiz bir, wetinimiz bir, dinimiz bir, bayriqimiz bir, düshminimiz bir, yene néme üchün pétishmaymiz. Bizni birleshtürüshke sewep boliwatqan ishlar bizni ixtilap qilishqa sewep boliwatqan amillardin tolimu büyük we yüksek ishlardur. Tarixni bilishning eng muhim sewebi bir xataliqni yene sadir qilmasliq üchündur.


Gerche bizning bezi jehetlerdin perqlirimiz bolsimu biz yenila bir millet,biz Uyghurlar. Biz düshmen emes qérindash.Bizning bir birimizge köngül bölüsh mejburiyitimiz bolupla qalmastin belki bir birimizge epuchan bolush we öz-ara epu qilishni telep qilish heqqimizmu bar.

Uyghurlardin öz dölitini azad qilish iradisi bolghanlar shu meqsetke yétidu. Biz choqum öz tupriqimizda erkin yashap, öz öyimizde xatirjem köz yumimiz. Buningsiz hayatimizning qimmiti bolmaydu. Biz erkinlikke érishishimiz bilen dunya téximu azad bolidu, dunyagha téximu güzel nersiler qoshulidu. Bizning büyük ghelibimiz bilen dunya téximu seltenetlik bolidu. Bizning öz menpetimiz üchün körsetken her bir tirishchanliqimiz dunyagha we insaniyetke paydiliq ishlar süpitide pütün insaniyetning bayliqigha aylinidu.

Xitay bizni wetinimiz tupraqliridin menggü yoqutush heriketlirini allaqachan bashlap boldi. Kelgüsi besh yil ichide che’tellerde yashawatqan Uyghurlarni parchilap bir birige düshmen qilish ishpilanliri bashlinip boldi. Xitay bizning eng küchlük nuqtimiz bolghan ittipaqliqimizgha eng ajiz bolghan halqimiz eqilsizlik we menmenlikimizdin paydilinip hujum qilidu. Eqil ishletmey, oylanmay birdemlik hésiyati we menmenlikini yéngelmigen shexsi ghoruri bilen ish qilidighanlar özlirimu bilmey Xitaygha yardemchi bolup qalidu. ijtima’i alaqe qoralliri keng omumlashqan , dunyadiki Uyghurlar asanla uyushalaydighan qolayliq shara’itlarda Xitayning buzghunchiliqi we ademlirimizdiki illetler bizge ichki urush we adawetlerning yéngi shekillirini élip kelmekte. Amérika we Yawropadiki döletlerning ijtiama’i taratqular arqiliq qalaymiqanchiliqqa duch kelgenlikini bilgen her bir adem Xitayning Uyghurlarni ijtima’i taratqular arqiliq urushqa salalaydighanliqini bilishi we hushyar bolushi kérek. Bir birimizni satqingha, xa’ingha chiqirish bir bolsa eqilsiz kishilerning, yene bir bolsa eqide-imansiz kishilerning ishi. Eqlimiz we imanimiz bizni bir ishqa höküm chiqirishta obdan éniqlap béqishqa buyruydu.

Bizning bir birimizge ishenmesliktin tartidighan ziyanlirimiz bir birimizge ishen’genliktin kélip chiqidighan éhtimalen ziyanlardin hessilep chong bolidu. Millet bolush süpitimiz bilen bizning kelgüsimizning kapaliti bizning uyushushchanliqimizning qanchilik küchlüklikige baghliq.

Dunyada bizge oxshash büyük ejdadliri we shanliq tarixi bolghan milletler köp emes. Biz Sherqi Türkistandin, Tarim we Altay tupraqliridin kökliduq. Tarixta dunyaning nurghun jaylirigha tarqalduq. Bügün hala shu tupraqlarda yashimaqtimiz. Özimizning shu shanliq tarixmizning bir qismi ikenlikimizni, bu büyük milletning bir parchisi ikenlikimizni , bügünki bu ulugh tarixi küreshning bir qismi ikenlikimizni chüshen’gen chéghimizda dunyada bizge qarshi turalaydighan héchbir küch bolmaydu. Biz adaletperwer we jesur millet bolush süpitimiz bilen herqandaq yerdiki , herqandaq zulumgha qarshi süküt qilmasliqimiz kérek. Biz adalet terepte turimiz. Terepsizlik peqet zalimlargha yardem béridu, hergizmu ézilgüchilerge emes.


Biz bashtin kechüriwatqan ixtilaplar we ittipaqsizliqlarni bizning halitimizdiki bashqa milletlermu bashtin kechürgen. Öz xelqining chéchilanghuluqi we nadanliqidin bashqilarmu zarlan’ghan, azaplan’ghan. Germanlarning büyük peylasopi Gyoté “ German xelqige qarisam könglüm buzulidu. Shexs süpitide qarisam xéli ésil körünidighan ademler bar, emma millet süpitide tolimu bichare. Germanlarni bashqa milletlerge sélishturghan chéghimda her küni dégüdek méni qiynaydighan azaplarni hés qilimen.” dégen.

Isra’iliye dölitining asaschisi we dölet atisi Té’odur Hérzl yehudilarning qalaqliqi we chéchilangghuluqi heqqide toxtalghanda “ biz Yehudilar qalaqliqtila, yolning eng arqisida qalduqla emes, belki Yawropadiki insanlarning qéninimu bulghiwettuq. Yehudilar barliq irqlarning dashqallirining arilashmisidin kelgen. “ dégen.

Bügünki künde German we Yehudilarning qandaq küchlük halette ikenlikini körüp turuptimiz. Bashqa milletler hel qilalighan mesililerni bizmu hel qilalaymiz. Barliq küch- quwwet, eqil -paraset, we bayliq öz hujudimizda. Sherqi Türkistanda bayliq intayin köp, emma eng zor bayliq wetinimizning igiliri bolghan ademlirimiz, Uyghurlardur.


Mesh’el Guruppisi teyyarlighan 11 parche ĞMuraji’etnameğ ge imza qoyup béring:
https://www.change.org/search?q=Torchlight%20Uyghur%20Group

Imza qoyush usuli:
http://www.freedomsherald.org/ET/cmp/Imza-qoyush.mp4

Rehmet!