PDA

View Full Version : Qelbimde Elem Bar, Qolumda Qelem (Ablikim Baqi Iltebir)



uaa_admin
06-08-06, 20:46
Qelbimde Elem Bar, Qolumda Qelem

Ablikim Baqi Iltebir


Shöhriti dastandek Hunlar neslimdur,
Dunyani titretken Turan eslimdur,
Pak Sherqiy Turkistan ana weslimdur,
Hör azad zamanlar altun peslimdur,
Qelbimde elem bar, qolumda qelem.

At sélip jenglerde atam Oghuzxan,
Düshmenning közige mixtek qadalghan,
El élip, sheher sélip pelwan atalghan,
Kök Böri tughliri elge qadalghan,
Qelbimde elem bar, qolumda qelem.

Sultanim Sutuqtur Muslim oghlidum,
Allahtin iman ép ghalip tughuldum,
Zulpiqar astida östüm chong boldum,
Ne qismet! Aqiwet yawgha bolghuldum,
Qelbimde elem bar, qolumda qelem.

Qéni shu, ejdadlar qurghan qesirler?
Altundek sehipe achqan esirler,
Qeshqerlik Mexmutlar yaygha tesirler,
Yusüp Xas Hajiptek alim nesiller,
Qelbimde elem bar, qolumda qelem.

Qanche ret bextimge échildi chéchek,
Yaqub Beg yéqildi, yirtildi yürek,
Bash wekil Sawutqa chiqmidi yölek,
Élixan Töremni yoq qildi pelek,
Qelbimde elem bar, qolumda qelem.

Zarlinar Allahqa imanim, dilim,
Zulmetlik zulumdin késildi tilim,
Iblislar derdide boghuldi gélim,
Mukcheydi tagh kebi jebridin bélim,
Qelbimde elem bar, qolumda qelem.

Aqidu qan-yashlar qara közümdin,
Kisildim paltida sépi özümdin,
Ketmeydu ahanet, töhmet yüzümdin,
We lékin qaytmidim qesem sözümdin,
Qelbimde iman bar, qolumda qelem.

Yalqunjar qisaskar yürek chogh kebi,
Titreydu wujudum mudhish sogh kebi,
Ghezeptin qanlirim aqar sel kebi,
Chaqnaydu kökte ay, yultuz tugh kebi,
Qelbimde iman bar, qolumda qelem.

Uyghurmen el qatar yashash heqqim bar,
Istiqlal alghidek turqi-terqim bar,
Jahalet mehkumdin asman perqim bar,
Alemde düshmendin üstün nerqim bar,
Qelbimde iman bar, qolumda qelem.

Qelemdin tughular nale zar, peryad,
Tughular ghezep hem küreshchan ewlad,
Qelemning küchidin ümidim shemshad,
Telimim qoralim, düshminim berbad,
Qelbimde iman bar, qolumda qelem.