PDA

View Full Version : Sirlar emdi echililishqa bashlidi



Balixan dadey
12-08-13, 21:14
Ey ziyu: «men ma mustafa dégen yalghan isim bilen mekkige jasusluqqa bardim»

Ixtiyariy muxbirimiz haji qutluq qadiri

2013-08-12


Hej perzini ada qilish üchün heremge kelgen musulmanlar erefatta turmaqta. 2012-Yili 25-Öktebir, seudi.

AFP 8-Ayning 8-Künidin bashlanghan xitayning jasusluq heriketliri we xitay ishliri boyiche élip bériliwatqan yaponiyediki yépiq yighinda esli özi xitay puqrasi, ilgiri xitay dölet bixeterlik ministirliqining shinjang ishxanisida xizmet qilghan, köp qétimliq uyghurlarni basturush heriketlirige qatnashqan we nurghunlighan uyghurlarni chetelge jasusluqqa ewetken, hazir sherqiy asiya döletlirining biride yashawatqan ey ziyu texellusluq xitayning «men ma mustafa dégen yalghan isim bilen mekkige jasusluqqa bardim» serlewhilik doklati yighin ehlining küchlük diqqitini tartti.

Ey ziyu doklatida mundaq dédi:
-2001-Yili 11-Séntebir weqesi yüz bergendin kéyin dölet bixeterlik ministirliqi uyghur aptonom rayonning dölet bixeterlik nazaritidin alghan ishenchlik uchurida «afghanistandiki sherqiy türkistan islam herikiti teshkilatining gholluq ezaliri afghanistandin qéchip seudi erebistangha toplandi» dégen uchur bilen 1998-Yili poskam seyli yézisidiki saqchixanigha hujum qilip saqchilarni öltürüsh délosigha chétishliq gumandarlarning hazir mekkide ikenliki toghrisidiki axbaratni tapshurup aldi. Buning bilen dölet bixeterlik ministirliqi bilen dölet jamaet xewpsizlik ministirliqi birlikte bir guruppa teshkillep mekkige bérish pilanini tüzdi. Méni yuqiridin mekkige bu xizmetni béjirip kélishke belgilidi. Men buyruqqa binaen bir qisim qisqa ayetlerni yadlidim. Namaz oqushni, islam dinining qaide-Yosunlirini ögendim, hetta musulman erkeklerge oxshash bolush üchün béyjingdiki dostluq doxturxanisida xetne qilindim. Shundaq qilip 2002-Yili 2-Ayda memliketlik islam diniy jemiyitining muawin reisi, emeliyette dölet bixeterlik ministirliqining xadimi abdurehim bilen ürümchige bardim. Bizni aptonom rayonluq jamaet xewpsizlik nazaritining naziri, shinjang siyasiy qanun komitétining sékrétari, aptonom rayonning muawin reisi jang shömén alahide kütüwaldi. Biz ürümchide biz bilen birlikte mekkige xizmetke baridighan guruppa ezaliri bilen tunji qétim körüshtuq. Ular jemiy töt kishi bolup hemmisila uyghur idi. Ular ürümchi sheherlik jamaet xewpsizlik idarisining muawin bashliqi qadir, aptonom rayonluq j x nazaritining saqchisi ismail, aptonom rayonluq dölet bixeterlik nazaritining xadimi ayshem we aptonom rayonluq tashqi ishlar, muhajirlar ishxanisining ereb tili terjimani erkin qatarliqlar idi.

Ey ziyu seperge chiqishtin ilgiriki xizmet teqsimati toghrisida toxtilip mundaq dédi:
-Ürümchidiki xizmet teqsimatimiz mundaq boldi, men guruppining barliq ishlirigha mesul boldum. Abdurehim manga yardemchi boldi. Qadir mekke, medine, riyad qatarliq sheherlerdiki özining oqughuchi we tijaretchi qulaqliridin uchur toplashqa mesul boldi. Ayshem seudi erebistangha yatliq qilinghan bir qisim uyghur ayalliridin yeni özining qulaqliridin uchur igileshke belgilendi. Ismail gumandarlar bilen söhbet ötküzüshke mesul boldi. Erkin söhbet xatirisi yézishqa we axbarat toplashqa qoyuldi. Shundaq qilip biz ürümchidin hej ömek bilen birlikte seudi erebistanning jiddeh shehirige yétip barduq.

Ey ziyu medinide özining guruppisidiki bu kishilerning élip barghan paaliyiti heqqide toxtilip mundaq dédi:
-Jiddehdin medinige yétip bérip, hej ömiki aldin orunlashturup qoyghan adettiki yataqqa chüshtuq. Yataqta dem éliwatsam, ürümchi sheherlik j x idarisining muawin bashliqi qadir kechte özining medinide turushluq kona quliqi xx isimlik bir tijaretchining bizni ziyapetke teklip qilghanliqini éytti. Ayshem ziyapetke özining qatnishalmaydighanliqini, kechte özining medinidiki özige xizmet qiliwatqan xx ayalning öyide uning bilen söhbette bolidighanliqini bildürdi.

Ey ziyu doklatida medinidiki xx isimlik qulaqning méhmandarchiliqidiki söhbetni teswirlep mundaq dédi:
-Bizni yataqqa xx isimlik qulaqning ikki adimi linkolin markiliq ikki aptomobil bilen alghili keldi. Biz aldin teyyarlap qoyulghan sowghatlirimiz élip tötimiz ikki aptomobiligha bölünüp olturup, xx qulaq orunlashturghan réstorangha barduq. Réstoran aldigha yétip bérish bilenla xx qulaq aptomobildin chüshüwatqan qadirni quchaqlap körüshüp ketti. Réstoran xormazarliq ichige sélinghan katta réstoran bolup, dastixanda toxu sütidin bashqa hemme nerse bar idi. Dastixanda bizge hem dost bolup bir qanche uyghurmu birge olturdi. Biz tötimiz behuzur dastixandiki taamlardin hozurlanghandin kéyin, men astaghina qilip, qadirning putigha tépip qoydum, bu dégenlik «özimizning gépimizge kéleyli,yeni qulaqning sözini anglayli» dégen menada idi. Qadir qandaqtur bir némilerni dep xx qulaqning quliqigha pichirlighandin kéyin, xx qulaq bizni réstoranning ayrim xanisigha bashlap kirdi. Biz tötimiz shuning bilen ayrim xanida xx qulaqning seudi erebistandiki yeni medinidiki uyghurlarning we bu yerde oquwatqan oqughuchilarning ehwali toghrisidiki bayanlirini anglashqa bashliduq. Bizning söhbitimiz kéche saet ikkige qeder dawamlashti. Biz xx qulaq bilen xoshliship, yataqqa qaytishqa temshiliwatqanda xx qulaq özi yighip qoyghan cheteldiki uyghur teshkilatlirigha ait teshwiqat waraqchiliri we kitab, zhurnallardin ikki sanduqni aptomobilning arqisigha sélip qoydi. Biz ikki sanduq matériyalni élip, yataqqa qayttuq.

Ey ziyu doklatida mekkide élip barghan mexpiy herikiti toghrisida toxtilip mundaq dédi:
-Biz mekkige barghandin kéyin, qadirning riyad, jeddeh, taif we mekkidiki barliq qulaqliri mekkige yighilip qadirni kütüp turghan iken.Biz ular bilen ayrim-Ayrim körüshüp söhbetleshtuq. Her künlüki dégüdek ziyapet söhbetler dawamliship turdi.

Ey ziyuning doklati axirlishish bilen teng, yaponiyelik bir ependi uningdin soal sorap:
-Xitay kommunistliri néme üchün sizdek islam dinigha étiqad qilmaydighan kishini uyghur jasuslirigha mesul qilip mekkidek musulmanlarning muqeddes yérige jasusluqqa ewetidu?-Dep soal soridi. Ey ziyu külüp turup:
-Xitay kommunistliri özige sadiq bolghan uyghur jasuslirighimu ishenmigenliktin yenila mendek xitaylarni ewetidu,‏-Dep jawab berdi.

Axirda ziyaritimizni qobul qilghan mekkidiki zhurnalist sirajidin ezizi bu xildiki jasusluq heriketliri heqqide toxtilip ötti.

Awaz ulinishidin tepsilatini anglang.