PDA

View Full Version : Dunya Uyghur Qurultiyi qurulghanliqining ikki yilliqi



Ixtiyari muxpir
18-04-06, 19:14
Dunya Uyghur Qurultiyi qurulghanliqining ikki yilliqini xatirileymiz

http://www.uyghurcongress.org/Uy/pressrelease.asp?ItemID=1222739656


Eziz wetendashlar;


DUQ qurulghanliqining ikki yilliq xatire künige qedem qoyghan bügünki künde, 2004- yili 18– April Sherqiy Türkistan (Uyghuristan) Milliy Qurultiyi bilen Dunya Uyghur Yashliri Qurultiyidin ibaret Weten sirtidiki siyasi teshkilatlarning ikki yitekchi orginining bir gewdige aylinip, Dunya Uyghur Qurultiyini royapqa chiqarghanliqining Muhajirettiki Sherqiy Türkistan Milliy azatliq kürishi tarixida dewir bölgüch ehmiyetke ige siyasiy hadise bolghanliqini DUQning Milliy birlik sepimizde, Xelq`ara munberde we teshkili qurulmimiz saheside qolgha keltürgen utuqliri delillep turmaqta.


Muhajirettiki Milliy mujadilimizning wekillik orginigha aylan`ghan DUQ ning ikki yilliq kechmishlirige we paaliyet musapisige nezer salsaq, kürishimizning stratègiyisini belgilesh, siyasiy dewaning tesir dairisini kèngeytish, Dèmokratik Döletler we xelq`ara jem`iyetlerning hesdashliqini qolgha keltürüsh, Milliy Mujadile qoshunining sapasini yuqiri kötürüsh, her sahe wetenperwerlirimizning maddiy we meniwiy himayisige èrishish qatarliq köp tereplerde siyasiy küresh tariximizda az körülidighan netijilerni yaratqanliqini mueyyenleshtürüshke heqliq ikenlikimizni hes qilishimiz mümkin.

Qisqighina ikki yil, biz üchün DUQ ning barliqqa kèlish, takamullishish we köpning ètirapigha, Xelq`araning nezirige chüshken shanliq tarix bolupla qalmay, dunya siyasiy sehniside Xitay mustebitliri shenige tègishlik zerbe bergen, Millitimizning iradisini tawlighan we arzusigha ilham bexish etken ehmiyetlik ikki yil bolup hesaplinidu.elwettiki, bu ghelibe DUQ ning rehberligide paaliyetlirini qanat yayduriwatqan herqaysi ellerdiki teshkilatlirimizning, pidakar ezimetlirimizning, her sahe wetenperwer qerindashlirimizning xalis ejrining mehsuli. Shundaqla, Uyghur xelqining meniwi Anisi, Muhajirettiki siyasiy dewaning lideri, Xelq`ara insan heqliri kürishining bayraqdari Rabiye Qadir xanim we Meshhur siyasiyun, Dèplumat Erkin Aliptekin ependining bir mushit bolup uyushup, zaman rayigha yarisha stratigiye bilen mürini mürige tirep serip etken bihisap mihnetlirining netijisi!

Biz Xelq`ara sehnide künsiri büyük tèmigha ayliniwatqan Sherqiy Türkistan Milliy herikitining netijiliridin iptixarlanghan cheghimizda, Erkinligimiz üchün shehid bergen, xitay zindanlirida insan qelipidin chiqqan wehshi jazalar bilen qiyniliwatqan, weten, milletning üchün bedel tölewatqan jesur ezimetlirimizni elwette xatirimizdin ayrimaymiz. Siyasiy, iqtisadiy, ijtimaiy, madeniy we diniy heq – hoquqliri eghir derijide depsende qiliniwatqan mezlum xelqimizning Ahu – zarini diqqitimizdin ayrimaymiz. Dunyaning her yeride sersan – sergerdan bolup uwalliq tartiwatqan eziz qan qerindashlirimizni nezirimizdin qachurmaymiz.

Bügünki eng büyük utuqlirimizning millitimizning nöwettiki eng addiy dert –elemlirige dawa bolalmaywatqanliqini hich unutmaymiz. Bu büyük mujadilining weten ichi – sirtidiki minglighan, onminglighan qerindashlirimizning imkani yar bergen dairidiki pidakarliqi, Maddiy we meniwiy yardemlirisiz nusret quchalmaydighanliqini hem unutmaymiz.

Biz bügün, DUQ qurulghanliqining ikki yilliqi munasiwiti bilen barliq wetendashlirimizni Rabiye Qadir xanim we Erkin Aliptekin ependiler rehberlikidiki bir tughning etrapigha zich uyushup, Sherqiy Türkistan milli herkiti üchün bir ülüsh hesse qoshushqa yene bir qetim chaqirimiz!

Zulum we mustebitlikning yemirilishige, heqqaniyetning haman ghelibe qilishigha eqli hem imani bilen ishengen her bir Uyghur bizning sepimizde! Milliy iradimizning sunmaydighanliqigha, musteqilliq arzu – isteklirimizning ölmeydighanliqigha wijdani we ghururi bilen ishengen her bir Uyghur bizning sepimizde! Insanliq sheripini, Milliy iptixarini qedirleydighan her bir Uyghur bizning sepimizde! Adalet we insaniy heq – hoquqni muqeddes bilidighan heqqaniyet dunyasi bizning sepimizde! Janabi heq Millitimizni miradigha yetküzsun! Bizge zulum we zorawanliqqa qarshi tewrenmes irade nisip etsun!

Hörmet bilen

Dolqun Eysa
Dunya Uyghur Qurultiyi Bash Katibi


2006-yili 4-ayning 18-küni