PDA

View Full Version : ELWIDA ANA (Farewell Mother)!



Elfidar Iltebir
18-06-12, 00:37
5 -Iyul bamdat namizidin keyin yezilghan xet

By Elfidar Iltebir

Qedirlik ana,

Meni kürming japalarda béqip chong qilghan, yimey yigüzüp, kiymey kiygüzüp
oqutqan mihriban ana. Eger bu xetni mushu tapta oquwatqan bolsang, shuni bilki, men emdi
öyge qaytip kilelmeymen. Köz yashliringni toxtitip, axirqi sözlirimge qulaq salghin jenim ana.
Esingdimu ana, 7 yash waqtimda, dadamning neme kesel bilen ölüp ketkinini
sorighinimda, türmide öpkisige soghuq tekkenliki üchün uzun yashiyalmidi degen iding. Dadamning türmige eksil'inqilabchi
dep kirip qalghinini eytip berginingde, balilarche nadanliq bilen anche chüshinelmigen idim, mana emdi 20 yashqa kelgende,
dadamning we dadamdek nurghunlighan alim we ziyaliylirimizning esli neme üchün yap - yash kitip qalghinini chüshinip yettim.
Dadamning ashu qizziq qeni mening tumurlirimda eqiwatidu emesmu apa. Bilisen, kichiklikimdin bezi naheqliqni,
heqsizliqni körsem chidimay arilishiwalattim, achchiqlinip kitettim. Sen manga sewir qilishni ögen'gin dep teselli beretting. 15
yildin beri dadamning yoqluqigha sewir qilip keldim.
Jenim apa, eslep baqe, qeshqerdiki taghamning qizliri ishleymiz dep ichkirige mejburiy halda mangghanda qanchilik
xapa bolup ketkenidim. Kichiklikimge qarimay, taghamgha " nemishqa tughulup chong bolghan yurtni tashlap natunush yerlerge
qizliringni ewetisen-silerge zadi pul lazimmu, ghorurmu? " dep achiqlinip ketkinimde, tagham "nan lazim" dep jawab
berginide, gepmu qilalmay yighlap ketkenidim. Sewir, sewir... Mana emdi taghamning ashu qizlirini körelmey yighlap yürginige
3 yildin ashti.
Yenichu apa, 2 yil burun yazliq tetilde aqsudiki tughqanlargha yardem qilimen dep turuwalghinimda, "dehqan bolmaq
asan emes, qizziq aptapning astida ettigendin kechkiche jismani emgek qilishqa sen chidimaysen deginingge qarimay, xoshal
halda ümid bilen yezigha barghinimda, suni tizginliwalghan bingtuenlikler bir ay saqlisaqmu su bermey, pütün etizdiki
qonaqlar qurup ketkenidi. Na ilaj yighqan barliq pulumni tughqanlarning ballirigha berip, yene ashu xitay bashliqlargha emes,
xudayimgha yalwurup, yamghur tilep yighlap ketkenidim. Ashu waqittimu sewir qilghin dep meni sen tutuwalghaniding ana.
He rast apa, sening billen bille oqup chong bolghan qoshnimiz ibrahim aka mehellidiki balilargha qur'ani kerim ayetlirining
menisini chüshendurup berimen dep öyige bizni chaqirghan künler esingdimu. Tunji qetim Muhemmet Peyghembirimizning
hayat hikayisini ibrahim akidin anglighan idim. Likin ikki hepte bolmayla ibrahim akini balilargha heqiqetni ögetkenliki
üchün saqchilar tutup ketkinide, akimizni qoyuwitinglar dep waqirap ketkinimdimu, sewir qil dep meni tutuwalghan iding.
Bundaq hikayilerni eyitsam tügimeydu. Singlingning qusiqidiki 4 ayliq balini mejburiy alduruwetkendimu, akangning
uniwersitetni püttürüpmu ish tapalmay yürgen oghli resturanda kawap ötküzidighan ishni tapqinigha xosh bolup ketkendimu,
uyghurche mekteplerde xitayche ögitimiz dep, güzel tilimiz uyghurchini yoq qilmaqchi buluwatqanliridimu sewir qilip chidap
kelgenidim jenim ana. Lekin bu axirqi weqe bekla chekidin eship ketti. Shawguendiki oyunchuq zawutida yüz bergen echinishliq
toqunushta yüzligen xitay lökcheklerning azla uyghurlarni haywanlardinmu better yirtquchluq bilen urup öltürginini körüp chidap
turalmidim ana. Ashu ishlesh uchun berip olup ketken qerindashlirimizningmu sanga oxshash yoligha töt kozlep telmürüp
turghan anisi, ayali we hetta umaq baliliri bardur apa. Bu naheqliqqe kimmu chidap turalaydu? Biz qachan'ghiche uyghur bolghanliqimiz
üchün mushundaq muamile körimiz dep nale qilip kettim. Biz bu tupraqlarning egisighu ana, qachan'ghiche tala
müshüklirining öy müshükini qoghlishigha qarap turimiz.
Shu kundin beri, dostlirim bilen meslihetliship qarar qilduq apa. Melimiz, bayliqlirimiz, tilimiz, qizlirimiz, hemme nersimizni,
ghorurimizni elip ketti, emdi ketse jan keter degen niyetke kelduq. Ölüm bir qetim kelidu ana, qerighimu bar,
yashqimu. Biz emdi sewir qilalmaymiz ana. Awazimni emdi hechkim basalmaydu.
Hazir 7 -ayning 5 -kuni ettigen, bamdat namazdin keyin, sanga bu xetni yeziwatimen ana. Bu sanga axiriqi qetim
yezishim bolup qilishi mumkin. Daim bir oghlum yoq dep könglüng yerim bulatti, manga qara, bügün sening nazuk qizing oghul
balilardek merdane, qorqmay ölümge ketip baridu. Ana, hergiz qorqma, men yalghuz emes, yüriki millet söygüsi bilen köygen
pütün yash qiz - oghullar birlik ichide awazimizni pütün dunyagha anglitimiz ana, eger men ölüp ketsem, dadamning yenigha
ketsem yighlima ana, mendin pexirlen'gin, sorighanlargha wetini üchün, milliti üchün shehit
boldi degin. Eger hemmimiz ölüp ketsek, mubarek rohlirimiz jennette uchriship bayriqimizning
rengi bolghan kök asmandin eziz yurtimizgha qarap dua qilip turimiz.
Mening hekayemni kelgüsi ewlatlargha eytip bergin ana, eger biz hesab alalmisaq,
kelgüsi ewlatlar bizning intiqamimizni choqum alidu ana.
Xeyir - xosh ana, ketkinimge yighlimay, millitim üchün dua qilghin, ketkinimge
yighlimay, sewir qilghin!

Unregistered
18-06-12, 00:39
Yuquridiki bu maqaleni chaplap qoyghuchi;

IHTIYARI MUHBIR : MEKKE