PDA

View Full Version : Zeherge qarshi küreshtiki yene bir düshmen Neshe



Unregistered
09-12-10, 17:04
Uyghur élide nöwette gerche xiroindin ibaret zeherlik chékimlikning bir qeder tizginlinip, chekküchilerning sanining ilgirikige qarighanda körünerlik azlighanliqi melum qiliniwatqan bolsimu, istansimiz igiligen uchurlargha qarighanda, yéqinqi yillardin buyan neshidin ibaret zeherlik chékimlik uyghur yashlirida oxshashla shiddet bilen yamrimaqta.
90 - Yillarning bashliridin tartip uyghurlar " xiroin" din ibaret zeherning küchlük hujumigha duch keldi, nurghun uyghur yashliri bu xil zeherlik chékimlikke öginip qélish seweblik yashliqini, hayatini nabut qildi, pütün ailisini bextsizlikke yoluqturdi, eydiz we bashqa egeshme bala ‏- Qazalar uyghur jemiyitide éghir bir ijtimaiy mesilige aylandi.
Zeherlik chékimlik yéqinqi 20 yil mabeynide uyghurlar duch kéliwatqan eng éghir ijtimaiy mesilining birige aylinip, uyghurlargha türlük balasi ‏- Apetlerni élip kelmekte. Uyghur yashliri zeherlik chékimlikler ichide, bolupmu xiroinning tesirige hemmidin bekrek uchridi. Bu zeherning zor balasi ‏- Apetlirige uchrighan uyghurlar xroingha " aq alwasti" depmu nam bergen.
Uyghur élidiki zeher cheklesh eydizning aldini élish meslihet sorash merkizining bashqurghuchilirining biri bolghan zahidening bildürüshige qarighanda, gerche yillardin buyan uyghur jemiyitide élip bérilghan zeher cheklesh heriketliri shundaqla xelq arisida qattiq sawaq élishtin shekillengen zeherdin hezer eylesh we uninggha qarshi telim ‏- Terbiyilerning tesiride, uyghurlardiki xiroingha öginip qélish mesilisi bir qeder tizginlengen bolsimu, yéqinqi yillardin buyan neshidin ibaret zeherlik chékimlik uyghur yashliri arisida bekrek yamrashqa bashlighan. Yarp zeher tashlash qiziq liniyisige téléfon qilghanlar arisidimu neshige ait meslihet soraydighanlar barghanche köpeymekte iken.
Zahide özining ürümchide zeher chekleshke ait élip barghan xizmetliri jeryanida hés qilghanliri boyiche neshining uyghur yashliridiki yamrash ehwalini tonushturdi.
Bu heqte yéqinda chetelge chiqqan bir uyghur yashmu, yéqinqi yillardin buyan hetta aliy mektep oqughuchiliri arisidimu neshe chékishning omumliship qalghanliqini, shundaqla buning asasen uyghur yashliridiki chüshkünlüktin kélip chiqiwatqan alametler ikenlikini bildürdi.
Uyghur élining zeherlik chékimlik we eydiz weziyitini közitip kéliwatqan shundaqla öz aldigha bu heqte tetqiqatlar élip bériwatqan kolombiye uniwérsitétining tetqiqatchisi memtimin ependi neshining ziyanliri heqqide toxtaldi.
Memtimin ependi yene, uyghur élidiki dairilerni uyghur élide zeher chekleshte qalaq, qélipliship qalghan wasitilerni tashlap, zeher chekleshte, jemiyetke éqip kiriwatqan türlük ziyandash zeherlerni ortaq tazilash, menbesini üzüp tashlash, zeher chekleshte uchur sistémisini berpa qilish we tehlil qilish, shundaqla her xil zeherlerge omumyüzlük ortaq zerbe bérishke chaqirdi.


http://www.rfa.org/uyghur/xewerler/tepsili_xewer/dushmen-neshe-12072010163906.html?encoding=latin