PDA

View Full Version : Kommunistik partiye insaniyet üchün bir apet



IHTIYARI MUHBIR
21-09-10, 15:32
'Kommunistik partiye insaniyet üchün bir apet!'
Muxbirimiz ekrem
2010-09-20
2010 - Yili 9 - Ayning 18 - Küni, falungongchilarning myunxéndiki ezaliri "kompartiyidin chékinishke imza toplash" paaliyiti élip bardi. Bu paaliyetni falungongchilarning myunxéndiki tarmaq teshkilati uyushturghan bolup, paaliyetke falungongchilarning myunxéndiki xitay we gérman ezaliridin köpligen kishi qatnashqan.


RFA Photo / Ekrem

Süret, 2010 - Yili 9 - Ayning 18 - Küni, falungongchilarning myunxéndiki ezaliri élip barghan "kompartiyidin chékinishke imza toplash" paaliyitidin körünüsh.


Myunxén shehrining meryem meydani dep atalghan merkizi qismida orunlashturulghan bu paaliyet nurghunlighan sayahetchilerning diqqitini özige jelip qilghan.

40 - 50 Xildin artuq xitay hökümitige qarshi teshwiqat mezmunliri orun alghan herxil wereqchiler, gérmanche hem xitayche gézitlerdin sirt, xitayning falungongchilar üstidin yürgüzüwatqan basturush siyasiti ekis ettürülgen resimlik lozunkilar we taxtaylar imza toplash meydanigha keng yéyilghan bolup, üsti bashliri qangha milengen, tömür qepes ichige solanghan bir ayalning chongaytilghan süriti bilen türmide ten jazasigha uchrawatqan bir erning süriti közetküchilerning diqqitini bekrek jelip qilghan.

Bolupmu, xitaydiki siyasiy mehbuslarning ichki ezalirini sétishtek insaniyetsiz qilmishlirigha ait süretlik xewerler kishilerning téximu bekrek qiziqishini qozghighan.

Mezkur paaliyetni orunlashturghan falungongchilarning myunxéndiki mesuli chéngang ependi ziyaritimizni qobul qilip, kommunistik partiyidin chékinish herikitini qollash yüzisidin élip bériliwatqan bu imza toplash paaliyitining uzundin buyan dawam qiliwatqanliqini, hazir xitayda 80 milyon kishining kompartiyidin chékinip chiqqanliqini, xitayda kompartiye yoqalmighiche, xelqning yaxshi künge érishelmeydighanliqini otturigha qoydi.

Chéngang ependi sözide, xitay kommunist hakimiyitining yalghuz xitay xelqi üchünla emes, az sanliq milletler üchünmu bir apet boluwatqanliqini, belki kompartiyining pütkül insaniyet üchün bir apet ikenlikini tekitlidi.

U sözini dawamlashturup, xitay kommunist hakimiyitining bügün uyghur qatarliq az sanliq millet xelqliri üstidinmu wehshiylerche qirghin siyasiti yürgüzüwatqanliqini, kommunistik partiyining künséri mustebitliship, yalghuz xitay xelqiningla emes, belki, az sanliq milletlerningmu ghezep - Nepritige uchrawatqanliqini eskertti.

Chéngang ependi teminligen „heqiqiy ehwal" namliq xitayche bir gézitke, qolgha élinghan falungongchilar türmide uchrawatqan qiyin - Qistaq, ten jazasigha ait süretlik xewerler bésilghan. Xewerde, mehbuslarning bedinige dezmal yéqilghanliqi, yingne sanchilghanliqi, kalteklep uruluwatqanliqi, itqa talitiliwatqanliqi qatarliq körünüshler ekis ettürülgen. 2010 - Yili 6 - Ayghiche, 3383 neper falungongchilarning qiynap öltürülgenliki, ularning yétim qalghan perzentliriningmu rehimsizlerche jazagha uchrawatqanliqi körsitilgen.

2010 - Yili 5 - Ayning 1 - Küni b d t ten jazasigha qarshi turush komitétining mesuli manfred nowak ependi teripidin otturigha qoyulghan xitayning falungongchilarning ichki ezalirini sétishqa munasiwetlik jinayetliri toghrisidiki doklati dunya jamaitining diqqitini jelip qilghan idi. Hazir uyghur siyasiy paaliyetchiliri, xitay türmisige toshup ketken uyghur siyasiy mehbusliriningmu ichki ezalirining sétiliwatqanliqini ilgiri sürmekte.

Xelqara kechürüm teshkilatining yéqinda élan qilinghan uyghurlargha munasiwetlik 2010 - Yilliq doklatida, 5 - Iyul ürümchi weqesidin kéyin qolgha élinghan uyghurlarning hésabini bilgili bolmaydighanliqi, nurghun uyghurlarning iz - Déreksiz yoqap ketkenliki, ölüm jazalirining üzlüksiz ijra qilinip kelgenliki, qolgha élish ishlirining 5 - Iyul weqesi yüz bérip bir yil ötken bügünki kündimu dawamlishiwatqanliqini otturigha qoyghan.

Doklatta cheteldiki 30 din artuq uyghurni ziyaret qilip, uyghur wetinining nöwettiki weziyiti toghruluq melumatlargha érishkenliki, xitayning uyghur wetinige qarita bir tekshürüsh ömiki ewetishke hazirgha qeder yol qoymaywatqanliqi, uyghurlarning weziyitining yildin yilgha nacharliship bériwatqanliqi bayan qilinghan.